शहापूर पंचायत समितीचे बीडीओ अशोक भवारी सक्तीच्या रजेवर

हनुमंतराव दोडके शहापूर पंचायत समितीचे नवे बीडीओ

२६सदस्यांच्या आंदोलनाला  मिळाले यश!

शहापुर/प्रशांत गडगे

मासिक सभेवर बहिष्कार टाकून बीडीओ अशोक भवारी यांच्या मनमानी कारभाराविरुद्ध आज सभापती, उपसभापती सह २६ सदस्य करणार होते उपोषण.

शहापूर-

   शहापूर पंचायत समितीचे सभापती ,उपसभापती व सदस्यांना विश्वसात न घेता मनमानी करीत असल्याचा निषेधार्थ अकार्यक्षम गटविकास अधिकारी यांच्या विरोधात पंचायत समितीच्या सर्व सदस्यांनी पुकारलेल्या आंदोलनाला यश आले आहे.जिल्हा परिषदेचे मुख्य कार्यकारी अधिकारी यांनी पंचायत समितीचे गटविकास अधिकारी अशोक भवारी याना तात्काळ सक्तीच्या रजेवर पाठवले असून त्याजागी हनुमंतराव दोडके यांची प्रभारी म्हणून नियुक्ती केली आहे.

    १५ वा वित्त आयोगाचा आराखडा न बनविणे तसेच सभापती , उपसभापती व सदस्यांना यांना विश्वासात न घेणे अश्या तक्रारी सर्व सदस्यांनी केल्या होत्या. गटविकास अधिकारी अकार्यक्षम असल्याचा ठपका ठेवत त्यांच्या बदलीचा ठराव पंचायत समितीच्या मासिक सभेत सर्व सदस्यांनी एकमुखाने घेतला होता. परंतु त्यावर कार्यवाही होत नसल्याने सभापती रेश्मा मेमाणे, उपसभापती जगन पस्टे, गटनेते सुभाष हरड सर, दशरथ भोईर, स्नेहल शिंगे, पद्माकर वेखंडे,एकनाथ भला, प्रकाश वीर, आदींसह सर्व सदस्यांनी ठाणे जिल्हा परिषदेचे मुख्य कार्यकारी अधिकारी डॉ. भाऊसाहेब दांगडे यांची १७ फेब्रुवारी रोजी भेट घेऊन निवेदन दिले होते.

    २६ फेब्रुवारी रोजीच्या शहापूर पंचायत समितीच्या मासिक सभेवर बहिष्कार टाकून उपोषण करण्याचा इशारा सर्व सदस्यांनी निर्णय घेतला होता.

    त्यानुसार मुख्य कार्यकारी अधिकारी यांनी अतिरिक्त मुख्य कार्यकारी अधिकारी रुपाली सातपुते यांना २५ फेब्रुवारी रोजी शहापूर पंचायत समितीमध्ये चौकशी साठी पाठवून सर्व सदस्यांचे म्हणणे ऐकून घेतले.

   त्यानुसार मुख्य कार्यकारी अधिकारी डॉ. भाऊसाहेब दांगडे यांनी तात्काळ अशोक भवारी यांना सक्तीच्या रजेवर पाठवून शहापुर पांच्यात समितीच्या गटविकास अधिकारी म्हणून हनुमंतराव दोडके यांना प्रभारी म्हणून नियुक्त केले आहे.त्यामुळे मुख्य कार्यकारी अधिकारी यांनी आमच्या आंदोलनाची दखल घेतल्याने त्यांच्या विनंतीला मान देऊन आजचे आंदोलन स्थगित करून आजची मासिक सभा घेण्यात आली.